വിരഹ ദുഃഖം
കണ്ണൊന്നു പൂട്ടി തുറക്കുന്ന നേരത്ത്
ഇവിടില്ല വയലും മരത്തണലും
രാവിലെ തൊട്ടുണർത്തും കിളി ശബ്‌ദവും
ഇന്നില്ല കേട്ടിടാൻ സാധ്യതയും
ഭവന നിർമാണത്തിൽ മത്സര ബുദ്ധിയോ
ഇരകളാകുന്നതോ പാടങ്ങളോ
അറിയാതെ പോകുന്നു മർത്യനീ ഭൂമിയിൽ
ഭൂമിക്കുമുണ്ടിന്ന് വിരഹ ദുഃഖം
പൂത്തുനിൽക്കുന്നൊരു നെൽമണിപ്പാടവും
ശാന്തമായ് ഒഴുകുന്ന അരുവികളും
പാറിപ്പറക്കുന്ന പറവയും തുമ്പിയും
ഭൂമിക്കിനിയെന്നും ഓർമ മാത്രം
തൻജീവിതം സുഖിപ്പിക്കുവാൻ നോക്കുന്ന
മർത്യനോ ചിന്തയത് തീരെയില്ല
ചവിട്ടടി ഓരോന്നും വേദന സൃഷ്ട്ടിക്കും
ഭൂമിക്കുമുണ്ടിന്ന് വിരഹ ദുഃഖം
അരുവിയിൽ നീന്തിത്തുടിക്കുന്ന മത്സ്യവും
മരമായ മരമൊക്കെ കയറുന്നയണ്ണാനും
കാലവർഷത്തിൽ കരയുന്ന തവളയും
കാണുമോ ഇനിയതെൻ പേരമക്കൾ
ഒരുക്കാം നമുക്കിനി ആറടി മണ്ണറ
കുഴിച്ചിടാം ഭൂമിയെ നമുക്കിന്നതിൽ
വേദനയുള്ളിലൊതുക്കി ചിരിക്കുന്ന
ഭൂമിക്കുമുണ്ടിന്ന് വിരഹ ദുഃഖം